Accademia VIVARIUM NOVUM
vizitează AccademiaEx conclauibus scholasticis Academiae VIVARII NOVI…
Ecce nouos discipulos Academiae VIVARII NOVI! Ecce animos iuuenum ad hauriendum ex thesauro cultus atque humanitatis generis humani paratos! Ecce cultores antiquorum rectoresque futurorum! Inter muros huius loci, longe a sollicitudinibus uitae cotidianae, ubi litterae coluntur necnon maximi aestimantur, nonnulli discipuli scientiam rerum persequuntur tamquam structores qui cotidie lapidem supra lapidem imponunt ut hoc aedificium commune, aedificium scientiae generis humani, augeatur ac perpulchre decoretur. Sed aedificium sine ualido fundamento substructo diu stare potest nullum, nam quonam pacto aliquid per longum tempus inter tot tempestates inconcussum manere potest nisi in uirtutibus nitatur? Quoquo uirtus tendit, eo scientia rerum inconcussa subsequetur; ubicumque disciplina aequitasque tamquam fundamentum habentur, litterae moresque florent!
Magistri et discipuli…
Cum primum conclaue scholasticum ingredimur, mundus tamquam mente fictus nobis ostenditur: inter discipulos magistrosque discrimen inuenitur nullum, cum utrique ad eandem scientiam contendant. Alter alterum ad sententias aperiendas notitiamque rerum diffundendam exhortatur necnon ii plurimi aestimantur qui modestiam modumque in rebus profitentur. Magistri quidem, qui discipulis usque adstant, numquam sese a culpa abstrahunt cum in qualibet re errauerunt.
Quae methodi rationesque docendi adhibentur?
Sed quonam pacto scholae cotidianae cedunt? Quae methodi rationesque docendi adhibentur? Scholarum uarietas tam magna quam numerus magistrorum est: Eusebium (sc. magistrum artis poeticae linguaeque Latinae) fabulas una cum discipulis confingere carminaque cantare plurimum delectat; Iuliano (sc. magistro litterarum Latinarum) nihil magis quam scaenis theatralibus uti placet; inter scholas Gerardi (sc. magistri linguae Graecae litterarumque Graecarum) nugae cum scitulissimis ueriloquiis commiscentur; Ignatius (sc. magister philosophiae antiquorum litterarumque Latinarum) tamquam grauitatis columen reuerentiam erga litteras necnon sententias ad unguem compositas colit; tandem, Aloisius (sc. magister litterarum aetatis renatarum artium) suo ingenio ad diligendos scriptores antiquos nos inuitat.
.
In proximum!
Quamquam nimia diuersitas uideri potest, tamen institutio quae in Academia VIVARII NOVI proponitur concordia nexa est: quidquid in conclaui scholastico discitur, utilissimum inter ceteras scholas fit; singulae lectiones libri qui ‘Familia Romana’ inscribitur efficiunt ut litterae antiquorum iucundiores fiant; omnis schola Gerardi uiam ad Graecorum philosophos diligendos latiorem reddit. Tali modo scientiae aedificium cotidie exstruitur, cum magistri non in sua quisque disciplina sese abdant, sed eiusdem doctrinae participes sint!
Omnia haec senos dies quaque septimana in Academia VIVARII NOVI fiunt. Tamen, inter tot scholas, iuuenibus tempus restat ut hanc doctrinam, uel muneribus uel humanioribus artibus, colant. Huic argumento proximam symbolam libenter dicabimus. In proximum!
Ionuț Raicea